ཁྱེད་མེད་པའི་དུས་འདིར།
བདག་གི་ཁོར་ཡུག་ལ།
དགོད་བྲོ་དང་ལྷག་བསམ་གྱི་དབེན།
སྐྱོ་སྣང་གིས་ན་ཟུག་གཏོང་དུས།
དྲན་གདུང་གི་མིག་ཆུ་དྲོན་མོ།
བདག་སེམས་ལ་ཡང་ཡང་འཁོལ།
བརྩེ་ལྡན་གྱི་ཨ་མ་ལགས།
ཁྱེད་མེད་པའི་དུས་འདིར།
ཟུར་ཟ་དང་བརྙས་བཅོས་རྩུབ་མོས།
བདག་གི་ཁེར་རྐྱང་གི་སེམས་པ་ཕྲ་མོ།
རྔུལ་ཆུའི་ཟུག་ཟེར་གྱི་ཐིགས་པས།
མུན་དོང་ལ་འདྲེན་སོང་།
བརྩེ་ལྡན་གྱི་ཨ་མ་ལགས།
བྱམས་བརྩེའི་འཛུམ་མདངས་ཀྱི་ཁེངས་པའི།
ཁྱེད་ཞལ་དུང་ཟླ་དཀར་པོ།
ལྷང་ལྷང་ཡིད་ལ་དྲན་དུས།
བདག་སེམས་ལང་ལོང་དུ་གཡོ་བཞིན།
དྲན་སེམས་སྙིང་ཁམས་ཀྱི་འདབ་མ།
སྐྱོ་གདུང་གིས་རྒྱུ་བསིལ་བུས་འདེད་སོང་།
བརྩེ་ལྡན་གྱི་ཨ་མ་ལགས།
སྔོན་ཆད་མཐོ་སྒང་གི་གཞི་ཁྱིམ་སྣུམ་པོར།
ལྷན་འཛོམས་དྲོ་སྐྱིད་ཀྱི་འོད་ཟེར།
བདག་གི་ཟག་ཕུང་སྟེང་ལ་ལང་ལོང་དུ་འབར་ཡང་།
དེ་རིང་། བས་མཐའི་གྲུ་ཁ་འདིར།
ང་གཅིག་པུ་ཁེར་རྐྱང་གི་མཚེའུ་ལྟར།
གདུང་སེམས་ཀྱི་སྣང་སྙིང་འཁྱག་གིས་བཅོམ།།
No comments:
Post a Comment