སྐྱིད་པའི་དབུས་གཞུང།

ཕྱག་ན་པད་མོའི་རྣམ་སྤྲུལ།

འབྲམ་སྟོན་རྒྱལ་བའི་གདན་ས།།

བཤད་སྒྲུབ་བསྟན་པ་དར་གནས།

འཕན་ཡུལ་ར་སྒྲེང་ཆོས་སྡེ།

ཕན་བདེའི་དགེ་མཚན་བཞད་པའི།

ལུང་རྟོགས་བསྟན་པ་འཛིན་ཡུལ།

འཕན་ཡུལ་ཤ་བ་དགོན་པ།

ཡིད་ལ་ལྷང་ལྷང་དྲན་བྱུང།

ཞི་ལྷག་ཟུང་དུ་འབྲེལ་བའི།

ཏིང་འཛིན་མཉམ་པར་འཇོག་ས།

འཕན་ཡུལ་པོ་ཏོ་དགོན་པ།

ཡིད་ལ་ལྷང་ལྷང་དྲན་བྱུང།

སུམ་རྩེན་ཞིང་ལ་འགྲན་པའི།

ཡིད་ཡོང་སྒྲུབ་པའི་གནས་མཆོག

འཕན་ཡུལ་སྣེ་ཟུར་དགོན་པ།

ཡིད་ལ་ལྷང་ལྷང་དྲན་བྱུང།

ཕན་སྦྱང་དགེ་འོས་མཛད་ས།

སྒོམ་སྒྲུབ་ཉམས་ལེན་གནང་ཡུལ།

འཕན་ཡུལ་ལྤྱང་གླིང་ཆོས་སྡེ།

ཡིད་ལ་ལྷང་ལྷང་དྲན་བྱུང།

བསྟན་པའི་ཕྱི་དར་དུས་སུ།

གནས་ཆེན་བཞི་ཡི་ཡ་གྱལ།

འཕན་ཡུལ་བྱམས་པ་སྤུན་གསུམ།

བི་ཤཱ་ཀ་མས་བཞེངས་འདྲ།

ངོ་མཚན་འབུམ་གྱིས་བསྐྲུན་ཞིང།

ཇོ་བོ་བཀའ་གདམས་བསྟན་པའི།

བསྟན་འཛིན་སྐྱེས་བུ་བཞུགས་ཡུལ།

དབུས་གཞུང་འཕན་ཡུལ་དྲན་བྱུང།

བླ་རྣམས་བྱང་སེམས་ཆེ་ཞིང།

བཙུན་རྣམས་དད་དམ་གཙང་བ།

འབངས་རྣམས་རྒྱལ་ཞེན་ཆེ་བའི།

དབུས་གཞུང་འཕན་ཡུལ་དྲན་བྱུང།

བལྟ་ན་མིག་ལ་མཛེས་པ།

བསམ་ན་སེམས་པ་དགའ་བ།

བཀའ་གདམས་པའི་བསྟན་པའི་བྱུང་གནས།

དབུས་གཞུང་འཕན་ཡུལ་དྲན་བྱུང།

ཨ་མ་དྲན་གདུང་།

སྐྱི་གཡའ་བ་ཡི་སྲིད་པའི་བར་མདོ་ནས།།

ལང་ལོང་གང་འགྲོ་མེད་པའི་་རྣམ་ཤེས་ཤིག།།

ཁབ་ཏུ་བཞེས་ཏེ་དལ་བའི་རྟེན་བཟང་འདི།།

སྦྱིན་མཁན་སྐྱེས་མ་ཁྱེད་ཉིད་སྙིང་ནས་དྲན།།

བྱིས་པའི་སྣ་ལུད་ཞལ་གྱིས་བྱི་དོར་མཛད།།

བྱིས་པའི་གཅིན་གྲངས་རང་གིས་མལ་དུ་བཏིང་།།

བྱིས་པའི་ལུས་དམར་ཚ་གྲང་འཁྱགས་དོགས་ཀྱིས།།

དྲོ་འཇམ་སྤུ་ཕྲུག་གནང་མཁན་སྐྱེས་མ་དྲན།།

མི་ཚོགས་ཁྲོད་དུ་བག་མེད་སྤྱོད་པ་ཡིས།།

ལམ་སྟོན་རིན་ཆེན་ནོར་བུར་འཁང་ར་བྱས།།

བྱ་ངན་ངོ་སོའི་ལས་ལ་ཉིན་སྦྲེལ་ཡང།།

ཞིམ་མངར་ཟས་ཀྱིས་བསྐྱངས་པའི་སྐྱེས་མ་དྲན།།

རྣམ་དཔྱོད་རིག་པའི་ཤེས་རབ་གཏེར་དུ་སྦས།།

མི་གཙང་ཟས་ལ་དང་གའི་དབྱེ་བ་བྲལ།།

ཉིན་མཚན་དུས་ཀྱི་ལྷིང་འཇགས་དཀྲོགས་ན་ཡང།།

བྱམས་བརྩེའི་འཛུམ་ཞལ་གསར་པས་བསུ་བ་གནང།།

བྱིས་པའི་ངང་ཚུལ་རང་འདོད་ཉིན་མཚན་འབྲེལ།།

ལེགས་ཉེས་བཀའ་སློབ་རླུང་གི་མགྲོན་དུ་བཏང།།

ཁྱི་ལྡོམ་བཞིན་དུ་གང་སར་ཉུལ་ན་ཡང།།

གང་དགའ་གང་འདོད་སྦྱིན་པའི་སྐྱེས་མ་དྲན།།

ལང་ཚོའི་མེ་ཏོག་བཅུད་ལྡན་ཟས་ཀྱི་འཚོ།།

ལང་ཚོའི་ཟེའུ་འབྲུ་བྱམས་དང་བརྩེ་བས་འཚོ།།

ལང་ཚོའི་འདབ་མ་ཞིམ་དམར་རོ་ཡིས་འཚོ།།

ཡོད་ཚད་བུ་ལ་སྦྱིན་པའི་སྐྱེས་མ་དྲན།།

བཞིན་རས་སྟེང་ལ་སྙེར་མས་བྲོ་གར་འཁྲབ།།

འཇམ་མཉེན་ཕྱག་གིས་ངང་པའི་ལག་པར་འགྲན།།

ཉིན་མཚན་དུས་དྲུག་ངལ་དུབ་ལས་ལ་བྲེལ།།

བྱམས་བརྩེའི་ལང་ཚོ་བརྟས་པའི་སྐྱེས་མ་དྲན།།

གངས་རིའི་ཁ་དོག་དབུ་སྐྲས་འཕྲོག་སྟེ་གྱོན།།

དྭང་གཙང་འདྲེན་བྱེད་མེ་ལོང་རབ་རིབ་གྱུར།།

རྒས་པ་སྲིན་བུས་ལང་ཚོ་བཅོམ་ན་ཡང།།

བྱས་ཚད་བུ་ལ་བསྟོད་པའི་སྐྱེས་མ་དྲན།།

དུར་ས།

དུས་རབས་ཉེར་གཅིག་སྐྱེད་ཚལ་ལྡུམ་རར་ཞི་བདེའི་མེ་ཏོག་འབྲས་བུ་འབུས།།

བསིལ་ལྡན་ལྗོངས་ཀྱི་ཞི་བའི་ཁམས་སུ་དྲག་གནོན་དུག་གིས་མི་ཆེ་འབར།

གཡོ་སྒྱུའི་ལས་ལ་ཤིན་ཏུ་་བྱང་བའི་བརྩེ་བྲལ་ཀླ་ཀློ་སྤྱང་ཀི་ཡིས།།

དཔའ་བོའི་ཆེ་སྲོག་རྒྱ་ཕྲག་གཏོར་ཏེ་སྟོང་ཚོ་མུན་པའི་བཙོན་དུ་བརྫངས།།

གངས་ཅན་སྣོད་བཅུད་བདདུ་སྡེས་བཅོམ་སྟེ་རྣག་ཁྲག་འཁོལ་བའི་རྦ་རླབས་འཕྱུར།།

གཅེས་པའི་ཚེ་སྲོག་གཏའ་མར་བཞག་སྟེ་ས་ཡ་དྲུག་གི་བདེ་སྡུག་བསྒྲགས།།

སྲིན་འབུའི་ཚོགས་ཀྱིས་ཡ་ང་བྲལ་བའི་དབྱུག་དང་མེ་མདའི་དྲག་ཆར་གྱིས།།

ཕ་རུས་དཀར་པོ་སཉིང་ལ་བཅངས་པའི་གངས་ཅན་དཔའ་བོའི་ཚེ་སྲོག་བཀུམས།།

རང་གི་རུས་ལ་དུངས་ཞེན་དམ་པའི་གངས་ཅན་སོན་རྩ་ཕོ་མོ་ཡིས།།

དམིགས་ཡུལ་གཅིག་ལག་གདངས་སྦྲེལ་ཏེ་མི་རིགས་འདི་ཡི་བདེ་སྡུག་ཆེད།།

རང་བཙན་ཐོ་རངས་རྔ་ཆེན་བསྒྲགས་པས་གཤིན་རྗེའི་ཕོ་ཉས་གདུག་རྩུབ་ཀྱིས།།

རྡུང་རྡེག་དྲག་པོས་ལྟེ་ཁྲག་གཏོར་ཏེ་རྒྱལ་གཅེས་དཔའ་བོའི་སྙིང་རྩ་འཕྲོག།།

རིགས་ཞེན་སྙིང་སྟོབས་དམ་ཚིག་རྡོ་རྗེ་དགུ་རླུང་ནག་པོའི་དཀྱིལ་ནས་འབར།།

གཞིས་བཞུགས་སྤུན་ཟླའི་ཡིད་ལ་བརྣག་པའི་རང་བཙན་མེ་ལྕེ་འགོག་མེད་ཤར།།

ལྷ་མེད་དྲང་བདེན་གཏན་ཚིག་མདའ་མོར་གཡོ་ཅན་རྒྱ་དམར་ངོ་གནོང་སྟེ།།

དབང་ཤུགས་དྲག་པོས་བཙན་གྱི་བལྐུལ་ཏེ་ཆོལ་གསུམ་སྐྱེ་རྒྱ་ཁྲག་ཏུ་བརྫིས།།

བླ་ན་མེད་པའི་རྒྱལ་པོ་འུ་དུམ་བཙན་པོ་མཆོག

བླ་ན་མེད་པའི་རྒྱལ་པོ་འུ་དུམ་བཙན་པོ་མཆོག

ལོ་རྒྱུས་ཀྱག་ཀྱོག་གི་བར་ནས།

ཁྱེད་ལ་དྲི་རྟགས་ཤིག་བཀོད་སོང་།

སྔོན་ཐོན་བཙན་པོ་འདི་ཡིིན་ཟེར།

བསྟན་པའི་དགྲ་བོ་ཡིན་ཡང་ཟེར།

ཤོད་རྒྱུན་སྤྲིན་ནག་དེ་ཡལ་རྗེས།

བདེན་པའི་འོད་ཟེར་ཞིག་འཁྲུངས་ངེས།

དུས་རབས་མང་པོ་ཡི་ཚོད་བགམ།

དེ་ནས་བདེན་རྫུན་མཐའ་ཞིག་གསལ།       

ཨོ་་་་་ང་ཡི་བཙན་པོ་གླང་དར་མ།

སྔོན་ཐོན་བསམ་བློ་ཡི་སྣེ་འཁྲིད།

བསྒྱུར་བཅོས་དོན་གཉེར་གྱི་དེད་དཔོན།

གངས་ཅན་གདོང་དམར་གྱི་མེས་པོ།

བླ་ན་མེད་པ་ཡིན་བཙན་པོ།

ཡང་ན་ལོ་གསུམ་གི་སྔས་སོང་།

ཡང་ན་ལོ་གསུམ་གྱི་ཕྱིས་སོང་།

ཞྭ་ནག་མདའ་མོ་དེའི་འོག་ནས།

ཁ་བའི་ལས་དབང་ཡང་འགྱུར་སོང་།

ཨོ་་་་་ང་ཡི་བཙན་པོ་གླང་དར་མ།

ཨོ་་་་་ང་ཡི་བཙན་པོ་་་ཡ་ང་བའི་བཙན་པོ།