ཀ་ཁ་ག་ངར་ལོ་གསུམ།།
ཁ་ནས་ཨའི་ལྦིའི་ལོ་གསུམ།།
ག་ཡིན་འདི་ཡིན་མེད་པའི།།
ང་ཅག་བཙན་བྱོལ་སློབ་གྲྭ།།
ཅ་ག་གང་ཡང་མེད་པར།།
ཆ་ལུགས་འདྲེས་མ་གྱོན་ནས།།
ཇ་ཆང་བག་མེད་སྤྱད་དེ།།
ཉ་མོ་ཉ་རྐྱང་ཆགས་འདུག།།
ཏ་རེ་སྒྲོལ་མ་ཀུན་མཁྱེན།།
ཐ་མལ་ང་ཚོར་གཟིགས་དང།།
ད་ལོ་ཡིག་ཚད་མི་ལོན།།
ན་ནིངས་འཛིན་གྲྭ་རང་ཆགས།།
པ་ཕ་ཨ་མས་གཙོས་པའི།།
ཕ་ཡུལ་ཡུལ་མི་ཀུན་ལ།།
བ་གླང་ལྟ་བུའི་སྤྱོད་པ།།
མ་གསུངས་ཐུགས་རྗེས་གཟིགས་རོགས།།
ཙ་གེ་ཙིག་གེའི་དོན་ལ།།
ཚ་ཟེར་ནད་ཀྱིས་གཟེར་འདུག།
ཛ་ཛོར་འཆལ་གཏམ་ཤོད་དུས།།
ཝ་མཆུར་དགའ་བ་རྒྱས་སོང།།
ཞྭ་མོ་སྣ་ཚོགས་གྱོན་ནས།།
ཟ་མའི་ཆེད་དུ་རྒྱུགས་ཏེ།།
འ་ཅག་ཁ་བ་ཅན་པའི།།
ཡ་མ་ནག་པོ་བཟོས་སོང།།
ར་ལ་ལུགས་སྐད་བརྒྱབ་ན།།
ལ་རྒྱ་མེད་པའི་རྟགས་རེད།
ཤ་ཚ་སེམས་ལ་བཟུང་ནས།།
ས་མཐོའི་ཕ་སྐད་མ་བརྗེད།།
ཧ་ཅང་དྲང་པོའི་གཏམ་ལས།།
ཨ་གསར་ཅན་གྱིས་ཚིག་མིན།།
ཧ་རི་ཙན་དན་ལེགས་བཤད།།
ཨ་རོགས་ཡིད་ལ་ཟུངས་ཤིག།།
No comments:
Post a Comment