བྱེས་བཞུགས་ཆོལ་གསུལ་ལས་སྣེ།།
རང་དོན་སྒྲུབ་པར་བྲེལ་ནས།།
༸སྐྱབས་མགོན་རྒྱལ་བའི་བཀའ་སློབ།།
རླུང་གིས་མགྲོན་དུ་བཏང་སོང།།
ནང་ཁུལ་རྐུབ་སྟེགས་དོན་དུ།།
ཁྱོད་ཤི་ང་གསོན་འཐབ་རྩོད།།
བློ་ཁོག་སྟག་ལས་ཆེ་བའི།།
ཡུལ་གྱར་སྤུན་ཟླ་ཅི་དྲགས།།
དབང་ཆ་ལོག་པར་སྤྱད་ནས།།
རང་ཕྲུག་ཨ་རིར་གཏོང་དུས།།
རང་སྐད་ལེགས་པའི་གཏམ་བཤད།།
ནེ་ཙོའི་མ་ཎིར་འགྲན་སོང།།
ཁ་ལ་མི་རིགས་ལ་རྒྱའི།།
མེ་ཆེན་ལྷང་ལྷང་འབར་ཡང།།
ལག་ལེན་འཁྱགས་པས་བསྡམས་ནས།།
ལུས་ལ་གྲང་ཤུར་བརྒྱབ་ཀྱིས།།
ཡང་དག་དམངས་གཙོ་ཡིིན་ཞེས།།
ཁ་ནས་ཡང་ཡང་སྒྲོགས་ཀྱང།།
གནས་ལུགས་ཕྲན་བུ་བརྗོད་ཚེ།།
རྒྱུ་ཡིས་སྲོག་ལ་འགུལ་སོང་།།
དབྱིན་ཡིག་ཕྲན་བུ་ཤེས་ཀྱང།།
ཀ་ཁ་འབྲི་ཀློག་མི་ཤེས།།
མི་རིགས་ལ་རྒྱ་བརྗོད་པ།།
ཆུ་ཡི་ལྦུ་བར་གྱུར་སོང་།།
ངག་ནས་ཆོས་སྤྱོད་བརྗོད་ནས།།
ལག་པས་ལྐོག་རྔན་བླངས་སོང།།
ཡ་རབས་བཟང་སྤྱོད་ཟེར་བ།།
ཁ་ཡིས་རྒྱན་ཙམ་རེད་འདུག།།
ཡང་དག་མང་གཙོ་ཡིན་ཞེས།།
ཁ་ནས་བརྒྱ་སྟོང་བཤད་ཀྱང།།
རང་དང་མི་མཐུན་མི་སྣར།།
རྒྱུག་ཁྱིའི་ཆོ་ལོ་སྤྲད་སོང།།
སྐད་ཡིག་བརྩི་སྲུང་དགོས་ཞེས།།
དཔྲལ་ནས་རྔུལ་ཆུ་ཟག་ཀྱང།།
དོན་དངོས་འཚོ་བའི་ཁྲོད་ན།།
སྐད་རིགས་ར་མ་ལུག་སྐད།
No comments:
Post a Comment