མི་གསར་ཁྲོད་ནས་བཙོན་དུ་ལོ་དུས་རིང་ཤོས་བཞུགས་མཁན་ཞུམ་པ་མེད་པའི་དཔའ་མོ་མཆོག

གྲ་བཞི་བཙོན་ཁང་ནང་བོད་རང་བཙན་གྱི་གླུ་གཞས་སྒྲ་འཇུགགནང་མཁན་གྱི་བཙུན་མ་བཅུ་བཞིའི་ནང་གི་ལོ་ཚད་མཐོ་ཤོས་གྲས་ཀྱི་ཆབ་སྲིད་བཙོན་ཟུར་གྲགས་ཅན་ཞུམ་མེད་དཔའ་མོ་ཕུན་ཚོགས་ཉི་སྒྲོལ་ལགས་ནི་འཕན་པོ་རིག་པའི་འབྱུང་གནས་སུ་སྐྱེད་ཆེད་བཀྲ་ཤིས་དབང་པོ་དང་སྐྱེད་མ་དཔལ་སྐྱིད་སྒྲོལ་མ་གཉིས་ཀྱི་བུ་མོར་སྤྱི་ལོ་ ༡༩༧༠ ལོར་སྐུ་འཁྲུངས། ཁོང་ལ་སྤུན་མཆེད་གཅེན་པོ་གཅིག་དང་། གཅེན་མོ་གཅིག གཅུང་པོ་གཅིག གཅུང་མོ་གཉིས་བཅས་ཡོད། དཔའ་མོ་མཆོག་ཆུང་དུས་སུ་པཱ་ལགས་གྲལ་རིམ་ཡིན་སྟབས་སློབ་སྦྱོང་བྱ་རྒྱུའི་གོ་སྐབས་ཕྲན་བུ་ཙམ་ཡང་ཐོབ་མྱོང་མེད། དཔའ་མོ་མཆོག་རང་ཉིད་ཀྱིས་འདོད་མོས་འོག་ལྷ་སའི་བྱང་ཕྱོགས་ཀྱི་ནེའུ་ཆུང་རི་བཙུན་དགོན་དུ་དམ་པའི་ཆོས་སྒོར་ཞུགས། བཙུན་དགོན་དུ་ལོ་ངོ་གཉིས་ཙམ་རིང་གཙོ་བོ་དགོན་པ་ཉམས་གསོ་དང་ཞོར་དུ་ནང་ཆོས་ལ་སློབ་གཉེར་མཉམ་དུ་གནང་ནས་ཞུགས་མུས་སྐབས་༸གོང་ས་མཆོག་ལ་ནོར་བྷེལ་ཞི་བདེའི་གཟེངས་རྟགས་འབུལ་རྒྱུ་ཐུགས་གཏན་འཁེལ་བ་ཤེས་ཕྲལ་ཞུམ་མེད་དཔའ་མོ་དང་དགོན་པ་ཅིག་པའི་བཙུན་མ་ལྔས་ལྷ་སར་བོད་རང་བཙན་སྐད་འབོད་ཁྲོམ་སྐོར་བྱེད་རྒྱུའི་བསམ་འདུན་གཅིག་མཐུན་བྱུང་།

དེ་དུས་རྒྱ་ནག་དམར་ཤོག་འགོ་འཛུགས་ནས་དྲག་པོའི་ཁྲིམས་གཞི་དང་པོ་དེ་བོད་ལ་སྡོམ་པའི་སྐབས་ཡིན། དེར་བརྟེན་ཁོང་ཚོ་ཨ་ནེ་དྲུག་གི་ཐབས་ཤེས་ཡོད་རྒུ་བཏང་སྟེ་བར་སྐོར་ནང་དུ་འཛུལ་ནས་སྤྱི་ལོ་ ༡༩༨༩ ལོའི་ཟླ་ ༡༠ ཚེས་ ༡༤ ཉིན་ལྷ་སའི་བར་སྐོར་ནང་དུ་ཁོང་ཚོས་བོད་རང་བཙན་ཡིན། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག་ཅེས་ཞི་བའི་སྐད་འབོད་བྱས་སྟབས་རྒྱ་དམར་གྱི་དམག་མིས་སྤྱང་ཀིས་ལུག་ཁྱུ་མཐོང་བ་ལྟར་མཆོངས་ནས་རྡུང་རྡེག་དྲག་པོས་ཉེན་རྟོག་པའི་རླངས་འཁོར་ནང་དུ་བཅུག་སྟེ་ཤར་རེར་ལྷ་ས་གྲོང་ཁྱེར་སྤྱི་བདེ་ཅུས་རྒུ་རྩ་ལྟ་སྲུང་ཁང་དུ་བསྐྱལ།

ཁོང་ཚོ་རྒུ་ཚ་ལྟ་སྲུང་ཁང་དུ་བསྐྱལ་རྗེས་བཙུན་མ་རེ་རེ་ཁང་མིག་རེ་རེར་བཅུག་ནས་དྲི་རྩད་བྱེད་འགོ་འཚུགས། དྲི་རྩད་བྱེད་སྐབས་ཉེན་རྟོག་པས་རང་ཉིད་ཀྱི་ཕ་མ་གསོད་མཁན་གྱི་དགྲ་བོ་ལྟར་གློག་རྒྱུག་དང༌། རྒྱུག་པ་སོགས་ཀྱི་ལག་ཆ་འདྲ་མིན་བེད་སྤྱོད་བྱས་ཏེ་ཉེས་རྡུང་ཚད་མེད་བཏང་བ་དང༌། ཁྱིས་འཇིགས་སྐུལ་བྱས་ནས་དཔའ་མོ་མཆོག་གི་སོག་པའི་ཚིགས་ཕུད་དེ་ལག་པ་བཅུས་རུས་བརྒྱབས་ནས་ལག་ལྕགས་རྒྱག་པ་མ་ཟད། དེ་རྗེས་ལག་ལྕགས་བཀྲོལ་ཏེ་ལག་པ་གཡོན་པའི་མཛུབ་མོ་རྣམས་རེ་རེ་བཞིན་སེན་མོའི་སྒང་ནས་ལྷམ་བཙེམ་བྱེད་ཀྱི་འཁོར་ལོ་ཞིག་གིས་ཨུ་ཁུང་ཡང་ཕུག་ནས་རྡུང་རྡེག་ཚ་ནན་ཞིག་བཏང་རྗེས།  ཡང་བསྐྱར་ཉེན་རྟོག་པ་གཉིས་ཀྱིས་ལྕགས་རིང་ཕྲ་མོ་ཞིག་གཟུགས་པོའི་སྟོད་སྨད་གཉིས་ལ་ཤུགས་ཆེ་བཞུས་ནས་བཟོད་དཀའ་བའི་ཉེས་རྡུང་མི་ཆོས་ལས་འདས་པ་ཚད་མེད་བཏང་ཡོད།

རྒུ་ཚ་ལྟ་སྲུང་ཁང་དུ་བཀག་སྐྱིལ་ཟླ་ཤས་ཀྱི་རྗེས་སུ་ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས་དཔའ་མོ་མཆོག་ལ་མི་རིགས་ཁ་བྲལ་གྱི་ཉེས་མིང་འོག་ལོ་ངོ་དགུ་དང་། ཕུན་ཚོགས་དཔལ་མོ་ལགས་སུ་ལོ་བརྒྱད། གཞན་དག་ལ་ལོ་གསུམ་གསུམ་གྱི་ཁྲིམས་ཐག་བཅད་ནས་དཔའ་མོ་མཆོག་དང་ཕུན་ཚོགས་དཔལ་མོ་ལགས་རྣམ་གཉིས་གྲྭ་བཞིའི་བཙོན་ཁང་དུ་བསྐྱལ། དཔའ་མོ་མཆོག་ནི། ༼གངས་ཅན་མི་རབས་གསར་པས་བོད་རང་བཙན་ཡིན་པའི་སྐད་འབོད་བྱས་པའི་ཉེས་མིང་འོག་རྒྱ་དམར་གྱི་ཁྲིམས་ཐོག་ནས་ཉེས་ཆད་ལོ་ཚད་རིང་ཤོས་ཀྱི་ཁྲིམས་ཐག་བཅད་པའི་བུད་མེད་བཙོན་པ་ཞིག་རེད།༽

རྒྱུན་དུ་གྲྭ་བཞིའི་བཙོན་ཁང་ནས་འགྱིག་ཤོག་གི་བཀབ་པའི་ཚལ་རིགས་འདེབས་སའི་ནང་དུ་ལུད་རྒྱག་དགོས་པ་དང༌། ལུད་དེ་གསང་སྤྱོད་ནང་ནས་དབོར་དགོས་ཀྱི་ཡོད། ལུད་དབོར་བའི་སྐབས་ཁ་རས་དང་ལག་ཤུབས་གཏན་ནས་གྱོན་ཆོག་གི་མེད། དེར་བརྟེན་གཟུགས་པོ་ཚང་མར་མི་གཙང་བའི་དྲི་མས་ཚོས་ནས་རིམ་པས་མི་གཙང་བ་ལ་རྩོག་གྲ་མེད་པར་གྱུར། ཆབ་བཙོན་ཚོར་རྒྱ་དམག་གིས་གདུག་རྩུབ་ཚད་མེད་གཏོང་གི་ཡོད།

སྤྱི་ལོ་ ༡༩༨༨ སྤྱི་ཟླ་ ༣ པའི་ཚེས་ལྔ་དང། དྲུག བདུན་བཅས་ནི་རྒྱ་དམར་གྱི་སྐར་ལྔའི་དར་དམར་འོག་ལ་འཚར་ལོང་བྱུང་བའི་བོད་ཀྱི་མི་རབས་གསར་པས་རྒྱ་དམར་གཞུང་གི་དྲང་བདེན་མིན་པའི་ཁྲིམས་འཁྱོག་སོགས་ལ་རྔམ་སྟོན་ཁྲོམ་སྐོར་གནང་བའི་དུས་དྲན་ཆེ་ཤོས་ཤིག་ཡིན་པས་རྒྱ་དམར་གྱིས་དེར་གནད་འགག་ཆེན་པོ་རྩི་ཡི་ཡོད། སྤྱི་ལོ་ ༡༩༩༢ ལོར་གོང་ཚེས་དེ་དག་བོད་པའི་ལོ་གསར་སྐབས་དང་ཁེལ་སྟབས། དཔའ་མོ་མཆོག་དང་རིག་འཛིན་ཆོས་ཉིད་ལགས། ཕུན་ཚོགས་པད་མོ་ལགས། བཙུན་མ་མ་ཡིན་པའི་བུད་མེད་ཀྱི་ཆབ་བཙོན་དང་པོ་ཨ་ཆུང་དག་ལགས། ཀརྨ་འཕྲིན་ལས་ལགས། རྒྱལ་མཚན་ཆོས་འཛོམས་ལགས། ཨར་གདམ་བཟོ་གྲྭའི་སློབ་དགེ་ཟླ་བ་སྒྲོལ་མ་ལགས་བཅས་ཀྱིས་དྲན་གསོ་དང་སྦྲགས་ཏེ་བཙོན་ཆས་ཕུད་ནས་རང་སོའི་གྱོན་ཆས་གྱོན་པས་རྒྱ་དམར་གྱིས་ཆབ་སྲིད་གནས་དོན་ཆེན་པོར་རྩིས་ཏེ་བཙོན་སྲུང་བ་དང༌། དྲག་ཆས་ཉེན་རྟོག་དམག་མིས་སྐེ་རགས་ཆབ་རྩི་དང༌། བེར་རྒྱུག་སོགས་བཞུས་ཏེ་རྡོག་རྫིག་བཏང་ནས་དེ་ཉིན་ཉེས་རྡུང་ཚབས་ཆེན་བཏང་ཡང་། བཙོན་པ་ཚོས་ལུས་ཐོག་ཏུ་མནར་གཅོད་ཇི་འདྲ་ཕོགས་ཀྱང་སྙིང་སྟོབས་ཞུམ་མེད་ཀྱི་ཉིན་གཉིས་པར་སླར་ཡང་བཙོན་ཆས་མི་གྱོན་པར་རང་གོས་གྱོན་ཆས་མུ་མཐུད་དེ་གྱོན་པས་བཙོན་སྲུང་བ་དང༌། དྲག་ཆས་ཉེན་རྟོག་དམག་མིས་དྲག་ནོན་བྱས་ཏེ་བཙན་ཤེད་ཀྱིས་ཐོག་ནས་བཙོན་ཆས་གྱོན་དུ་བཅུག་པ་མ་ཟད་ཆབ་བཙོན་ཨ་ཅག་ཆུང་བདག་ལགས་དང༌། ཕུན་ཚོགས་པད་མོ་ལགས། ཟླ་བ་སྒྲོལ་མ་ལགས་བཅས་མུན་ནག་འདོམ་གང་གྲུ་བཞིའི་ནང་ལ་ཟླ་བ་གསུམ་ཙམ་རིང་བཅུག་པ་རེད།

༡༩༩༣ ལོའི་ཟླ་ ༥ ནང་དཔའ་མོ་མཆོག་དང་གཞན་བཙུན་མ་ ༡༣ ནས་ལྐོག་ཏུ་གངས་ལྗོངས་ཡ། གངས་ལྗོངས་ཅེས་པའི་བོད་རང་བཙན་གྱི་གླུ་གཞས་མཉམ་དུ་བླངས་ནས་སྒྲ་འཇུག་བྱས་སྟབས། བཙོན་སྲུང་བས་ཉིན་གཉིས་པའི་དགོང་དྲོ་ཤེས་རྟོགས་བྱུང་སྟེ་སྒྲ་འཇུག་བྱེད་བཞིན་པའི་སྐབས་གློ་བུར་དུ་ཉལ་ཁང་ནང་དུ་ཡོང་ནས།  སྒྲ་ཕབ་འཕྲུལ་ཆས་སོགས་བཙན་འཕྲོག་བྱས། ཐོག་མར་སྒྲ་ཕབ་འཕྲུལ་ཆས་ཡོང་རྐྱེན་བཙལ་འཚོལ་བྱས་ནས་ཉེས་རྡུང་ཚད་ལས་འདས་པ་བཏང་སྟེ་དམ་དྲག་ཁང་དུ་བཅུག  གཞས་ཀྱི་ནང་དོན་ལ་དྲི་རྩད་མང་པོ་བཏང་མཐར་༡༩༩༣ ལོའི་ཟླ་ ༡༠ ནང་བཙུན་མ་ ༡༤ ལ་ལོ་ཚད་སྤར་ཆ་བྱེད་རྒྱུའི་ཁྲིམས་ཐག་ཁྱབ་བསྒྲགས་བྱས་པ་དང༌། དཔའ་མོ་མཆོག་དང་། རྒྱལ་མཚན་སྒྲོལ་དཀར་ལགས། ངག་དབང་ཆོས་སྐྱིད་ལགས་བཅས་ལ་ལོ་ཚད་ ༨  ཀྱི་ཁྲིམས་ཆད་འཕར་སྣོན་བྱས་ཡོད།

དཔའ་མོ་མཆོག་གི་བདེན་པའི་སྙིང་སྟོབས་དང་འགྱུར་མེད་ཀྱི་དམ་བཅར་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཁག་ནས་རྗེས་སུ་ཡི་རངས་དང་བསྔགས་བརྗོད་ཀྱི་ཞུས་ཏེ།  རི་སྦོགས་འགྲོ་བ་མིའི་ཐོབ་ཐང་ལྷན་ཚོགས་ནས་རང་དབང་དང་དམངས་གཙོ་དོན་དུ་དཔའ་ངར་ཞུམ་མེད་ཀྱི་དྲག་པོའི་སྲིད་གཞུང་འོག་ཏུ་ལས་འགུལ་སྤེལ་མཁན་འཛམ་གླིང་གི་རྩེར་སོན་གྱི་མི་སྣ་བཞིར་སྤྱི་ལོ་ ༡༩༩༥ ལོའི་རི་སྦོགས་ཀྱི་བྱ་དགའ་ཕུལ་བའི་ནང་ནས་གཅིག་དཔའ་མོ་མཆོག་ཡིན།

༡༩༩༦ ལོའི་ཟླ་ ༤ ནང་རྒྱ་དམར་གྱིས་ངན་ཇུས་འཆར་གཞི་ལྟར་བཙོན་སྲུང་བས་ཆབ་བཙོན་ཚོར་གཙང་སྦྲ་ཡག་པོ་མ་བྱས་པར་ཁ་གཡར་ཏེ་བཙུན་མ་མང་པོར་ཉེས་ཁག་གི་སྒོ་རའི་གྱང་འགྲམ་དུ་འགུལ་མེད་སྐེ་རེར་ལངས་སུ་བཅུག་ཏེ་ཚིག་ངན་བརྗོད་ནས་ཉེས་རྡུང་ཚད་མེད་གཏོང་སྐབས། དཔའ་མོ་མཆོག་དང་བཙུན་མ་ཚང་མས་རང་འགུལ་གྱི་ཐོག་ནས་ཕོར་པ་སོགས་ཕྱིར་བསྡུ་བྱས་ཏེ་ཉིན་བཞིའི་རིང་ཆུ་ཐིག་ཙམ་ཡང་མི་འཐུང་བར་ཟས་བཅད་ངོ་རྒོལ་བྱས་ཏེ་བཙུན་མ་གཟུགས་པོ་གཅོང་ཅན་འགའ་རེ་ཟས་རིགས་མེད་པའི་རྐྱེན་གྱིས་རིལ་འགྲོ་བ་སོགས་དཀའ་ངལ་རབ་དང་རིམ་པ་ཕྲད་ཀྱང་ད་དུང་སོ་སོའི་ལངས་ཕྱོགས་ལ་ནམ་ཡང་གྱུར་བ་མེད་པར་བརྟན་པོར་གནས།

༡༩༩༨ ལོའི་ཟླ་ ༥ ཚེས་ ༡ དང་ཚེས་ ༤ ཉིན་གྲ་བཞི་བཙོན་ཁང་དུ་རྒྱ་གཞུང་གི་རྒྱལ་དར་སྒྲེངས་འཛུགས་བྱེད་སྐབས་བཙོན་པས་ཞི་བའི་ངོ་རྒོལ་བྱེད་སྐབས་དྲག་ཆས་ཉེན་རྟོག་དམག་མི་དང༌། བཙོནསྲུང་བས་ཁྲག་དྲི་བྲོ་བའི་དྲག་གནོན་བྱས་ཏེ་དོན་རྐྱེན་དེ་གཉིས་ནང་ལོ་ན་ཆུང་བའི་སྲིད་བཙོན་བརྒྱད་ཀྱི་ཚེ་སྲོག་ཤོར་བ་དང༌། སྲིད་བཙོན་མི་གྲངས་༢༧ ལ་ཚད་གཞི་མི་འདྲ་བའི་ལོ་ཚད་འཕར་སྣོན་བྱས་ཡོད། སྐབས་དེ་དུས་དཔའ་མོ་མཆོག་དང་བཙོན་པ་རྙིང་པ་ཚོ་ཉལ་ཁང་ནང་དུ་བཅུག་ཡོད་ཀྱང་། སྒེའུ་ཁུང་གི་ཤེལ་སྒོ་བཅག་ནས་དེའི་བར་སེང་ནས་བོད་ལ་རྒྱལ་དར་ཡོད། ང་ཚོའི་ས་ཆར་རྒྱ་མིའི་རྒྱལ་དར་བཙུགས་མི༌ཆོག བོད་རང་བཙན་ཡིན་ཞེས་སྐད་འབོད་བྱས་སྟབས། དེ་མ་ཐག་ཏུ་དྲག་ཆས་ཉེན་རྟོག་དམག་མིས་ཁྱིས་ཤ་ཁྲག་མཐོང་བ་ལྟར་ཁོང་ཚོའི་ཉལ་ཁང་ཕྱོགས་སུ་ཤར་རེར་རྒྱུག་ཡོང་སྟེ་བཙོན་པ་རྣམས་ཕྱི་ལ་བཏོན་སྟེ་རྒྱུག་པ་དང༌། སྐེ་རགས་ཆབ་ཙེ། རྡོ། མཁུ་མཚུར་གང་བྱུང་གིས་བཞུས་ནས་ཁྲག་དྲི་བྲོ་བའི་དྲག་གནོན་བྱས་ཏེ་ཚང་མ་རྨས་སྐྱོན་ཚབས་ཆེན་ཕོགས་པ་དང༌། ལ་ལ་མགོ་ནས་ཁྲག་དོན་པ་དང༌། ལ་ལ་ངོ་གདོང་ནས་ཁྲག་དོན་པ། རྐང་པ་བཅག་པ། རྩིབ་མ་བཅག་པ་སོགས་རུ་ཁག་གི་སྒོ་རའི་ནང་ཁྲག་གི་ཁེངས་ནས་དམར་འཐིལ་ངེར་རེ་ཞིག་བཤས་ར་དང་གཉིས་སུ་མེད་པར་གྱུར། དེ་ནས་བཟུང་ཟླ་བ་གསུམ་ཙམ་རིང་ཁང་པའི་ཕྱི་ལ་མི་བཏོན་པར་ཉིན་མཚན་དབྱེར་མེད་ཁང་པའི་ནང་བཅུག་པ་མ་ཟད། ནང་མིའི་ཐུགས་འཕྲད་ཀྱང་ཟླ་ ༦ ཙམ་རིང་བཀག་འགོག་བྱས།

རྒྱུན་དུ་རྒྱ་དམར་གྱིས་བཙོན་ཁང་ནང་ཆབ་བཙོན་ཚོར་ལས་ཀ་བལ་སླས་བྱེད་འཇུག་གི་ཡོད། ཉི་མ་གཅིག་ལ་སྐུད་པ་ཕྲ་མོ་ཡིན་ན་སྲང་གཅིག་དང༌། སྐུད་པ་སྦོམ་པོ་ཡིན་ན་སྲང་གཉིས་སླས་ཚར་དགོས་པ་རེད། གལ་སྲིད་དེ་མ་ཚར་ན་ཟླ་བ་གཅིག་གི་ནང་མིར་ཐུག་འཕྲད་ཀྱི་དུས་ཚོད་དེ་སྤྲོད་ཀྱི་མེད། ལས་ཡུལ་གྱི་ཁང་པའི་ནང་དུ་ཉི་མ་ནི་གསེར་ལས་དཀོན་པ་བཞིན་ཧ་ལམ་མཐོང་རྒྱུ་མེད། དགུན་ཁར་ལག་པ་གྲང་ནས་ལག་པ་ཚང་མ་རྨ་ཆགས་ནས་དཀའ་ངལ་ཧ་ཅང་ཆེན་པོ་ཡོད་པ་མ་ཟད། ཉིན་གང་ཤིང་གི་རྐུབ་སྟེགས་ཤིག་གི་ཐོག་ཏུ་སྡོད་དུ་བཅུག་ནས་དེའི་སྟེང་དུ་སོ་སོའི་གྱོན་ཆས་གཏིང་བ་མཐོང་ན་ཉེས་རྡུང་གཏོང་གི་ཡོད། དཔའ་མོ་མཆོག་ཤིང་གི་རྐུབ་སྟེགས་སྟེང་དུ་ཡུན་རིང་སྡོད་དུ་བཅུག་པའི་རྐྱེན་གྱིས་དཔྱི་མགོའི་པགས་པ་རྡོལ་ནས་ནད་མནར་ཤུགས་ཆེན་བྱུང་ན་ཡང་སྔར་གྱི་དམའ་བཅར་གཡོ་འགུལ་སྤུ་ཙམ་ཐེབས་མྱོང་མེད།

སྤྱི་ལོ་ ༡༩༩༨ ལོར་ཨ་རིའི་ནང་ཡོད་རྒྱ་ནག་དྲུག་བཞིའི་དུས་དྲན་ཚོགས་ཆུང་དང་རྒྱ་ནག་ཞི་བདེའི་ཚོགས་པ་ཐུན་མོང་ནས། པེ་ཅིང་གནམ་བདེ་སྒོ་མོ་ཐང་ཆེན་ལ་སློབ་ཕྲུག་གིས་དམངས་གཙོའི་ལས་འགུལ་སྤེལ་ནས་ལོ་ངོ་བཅུ་གཉིས་འཁོར་བའི་དྲན་གསོའི་མཛད་སྒོ་ ཟླ་ ༦ ཚེས་ ༣ ཉིན།  བོད་ཀྱི་རང་དབང་གི་ཆེད་དུ་ཞི་བའི་འཐབ་རྩོད་གནང་མཁན་དཔའ་མོ་མཆོག་གིས་དཔའ་ངར་ཞུམ་མེད་ཀྱི་སྙིང་སྟོབས་ལ་བསྔགས་བརྗོད་དང་། རང་དབང་དང་དམངས་གཙོ་རྩོད་ལེན་གྱིས་གཟེངས་རྟགས་ཤིག་ཀྱང་ཕུལ་ཡོད།

སྤྱི་ལོ་ ༢༠༠༤ ལོར་གཙོ་བོ་༸གོང་ས་མཆོག་ཐུགས་རྗེའི་བཀའ་དྲིན་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཁང་། བོད་དོན་རྒྱབ་སྐྱོར་བ་ཚོའི་གནོན་ཤུགས་ལ་བརྟེན་ནས་མུན་དོང་བཙོན་ཁང་ནང་དུ་ངོ་ལོ་བཅོ་ལྔ་ལྷག་དཀའ་སྡུག་འདྲ་མིན་མྱང་རྗེས་གློད་གྲོལ་ཐོབ་ཀྱང་ཁྱིམ་དུ་མི་གཞན་དང་འབྲེལ་བ་བྱ་རྒྱུ་ལྟ་ཅི་སྤུན་མཆེད་གཞན་ཚོར་ཡང་ཐུག་ཕྲད་གཏན་ནས་བྱས་མི་ཆོག་པར་རྒྱ་དམར་གྱིས་བཏང་འཛིན་དམ་པོའི་འོག་ཏུ་རང་ཁྱིམ་དུ་ངོ་ལོ་གཉིས་ཙམ་རིང་རང་དབང་ཏིལ་འབྲུ་ཙམ་མེད་པར་བཟང་བཙོན་ལ་གནས།

དེ་ནས་སྤྱི་ལོ་ ༢༠༠༦ ལོར་ཡང་བསྐྱར་༸གོང་ས་མཆོག་གི་ཐུགས་རྗེའི་བཀའ་དྲིན་དང་། འགྲོ་བ་མིའི་ཐོབ་ཐང་གི་ལྷན་ཚོགས། རྒྱལ་སྤྱིའི་གནོན་ཤུགས་ལ་བརྟེན་ནས་ནད་གསོ་སྨན་བཅོས་ཀྱི་མིང་ཐོག་ནས་གློད་གྲོལ་ཐོབ་སྟེ་ཨ་རིར་ཕེབས་ནས་༸གོང་ས་མཆོག་ཐེངས་པོ་མཇལ་སྐབས་༸གོང་ས་མཆོག་གིས་དཔའ་མོ་མཆོག་ལ་ད་ལྟ་གཟུགས་གཞིའི་གནས་སྟངས་གང་འདྲ་ཡོད་མིན་གྱི་འཚམས་འདྲི་དང་བྱམས་བརྕེའི་ལམ་སྟོན་གྱི་བཀའ་སློབ་གནང་། ཁོང་གིས་འགྲོ་བ་མིའི་ཐོབ་ཐང་ལྷན་ཚོགས་ཁག་ལ་བོད་ནང་གི་འགྲོ་བ་མིའི་ཐོབ་ཐང་ཐ་ཤལ་ཡིན་པའི་སྐོར་ལ་གསུང་བཤད་ཐེངས་མང་གནང་ཡོད།

 སྤྱི་ལོ་ ༢༠༠༧ ལོར་རྒྱ་གར་ལ་གནས་གཟིགས་ལ་ཕེབས་སྐབས་རང་གཞུང་གིས་ཞུ་འབུད་ལྟར་གཞིས་ཆགས་ཁག་དང་དགོན་སྡེ་སོགས་ལ་བོད་ཀྱི་ཆབ་སྲིད་གནས་སྟངས་དང་། ཞུམ་མེད་དཔའ་མོ་མཆོག་གི་མཚོན་པའི་ཆབ་སྲིད་བཙོན་པའི་ལུས་ཐོག་ལ་རྒྱ་དམར་གྱིས་མུན་ནག་གི་བཙོན་ཁང་དུ་གདུག་རྩུབ་གང་འདྲ་གཏོང་གི་ཡོད་མེད་སྐོར་ལ་གསུངས་བཤད་གནང་བ་ཕེབས་ཡོད། ད་ལྟ་ཞུམ་མེད་དཔའ་མོ་ཕུན་ཚོགས་ཉི་སྒྲོན་ལགས་ཡུན་རིང་མནར་གཅོད་དབང་གིས་གཟུགས་གཞི་གཅོང་ཅན་དུ་གྱུར་ཏེ། གནས་སྟངས་ཧ་ཅང་གི་ཞན་པོའི་ངང་ནས་སུད་སེར་སྨན་བཅོས་དང་བཅས་བཞུགས་བཞིན་ཡོད། ། །།

ངས་པོ་རྒྱལ་མཚན།